პაპმა ვირტუალური ურთიერთობისადმი საკუთარი დამოკიდებულება მსოფლიო ურთიერთობის დღესთან დაკავშირებით გამოხატა. მიმართვის ტექსტი ვატიკანის ოფიციალურ საიტზე 24 იანვარს გამოქვეყნდა.

პაპმა აღნიშნა, რომ სოციალურ ქსელებში ურთიერთობა ახალი ნაცნობების შეძენის, ცოდნის ურთიერთგაზიარების და კულტურათა შორის დიალოგის საშუალებას იძლევა.

ამასთან, პაპმა ხაზგასმით აღნიშნა, რომ თავიდან უნდა ავიცილოთ "პარალელურ რეალობაში ჩაფლობის” საფრთხე. პაპმა ყველას მოუწოდა, სოციალურ ქსელებში ისეთი პროფილები არ შექმნან, რომელიც ადამიანის რეალურ დახასიათებას არ შეიცავს.

რომის პაპს კონკრეტული სოციალური ქსელი არ დაუსახელებია. პაპმა, ზოგადად, ვირტუალური ურთიერთობის ფენომენზე ისაუბრა. ურთიერთობის საერთაშორისო დღის სულისჩამდგმელი სწორედ ვატიკანია.

ბენედიქტე XVI ელექტრონული ფოსტითაც სარგებლობს. მან უკვე მიმართა ყველა კათოლიკე მღვდელს და მორწმუნეებს, ინტერნეტი ეკლესიის პოპულარიზაციისთვის გამოიყენონ.

შარშან მსოფლიო ურთიერთობის დღესთან დაკავშირებით ბენედიქტე XVI-მ კათოლიკე მოძღვრებს მოუწოდა, რომ სახარება ყველა შესაძლო ტექნიკური საშუალებით, მათ შორის ბლოგების საშუალებით ექადაგათ.